2023-07-23 00:00:47
9/نزلة ...... في رثاء ام البنين عليها السلام
يالسافرت گلب امّـك انكسر
اتمنّــه يبنـي تـتــرك السـفـر
.....................
ياحبـيـب الزهـره يُمّه يالعشت بنفاسي
آنـه ام عبـاس يبنـي فـدوه الك عباسي
دنّگت راسي بغيابك بيش اشيلن راسي
وانّت ما موجـود يمي يااعــز كـل ناسي
طبعه الغدر ما يرحم الدهر
اتمنّـه يبنـي تـتــرك السفــر
......................
حلوه يُمّه الدار چـانـت نورك مضوّيـــها
هسّه يحسين بغيابك كلشي ماظل بيها
ظلمه يبني الدر وحشه ما اطـبّـن ليـــها
الـدار ما تـنـطـب ييُمّه لو رحل راعيـــها
بس ذكرياتك يبني والصور
اتمنّـه يبنـي تـتـرك الســفـر
......................
ما يـهـمّـونـي بنينـــي انـت شـاغـل بالي
لا تظن يحسين غيرك عندي واحد غالي
تـدري لمّـن ودّعـتـنــي گـطّــعـــت دلّالي
حالي بـغـيــابـك تـغـيّـر الله يدري بحالي
تارك غيابك عالوجه أثر
اتمنّـه يبني تترك السفـر
........................
وحشه يحسين المدينه اظلمت بغيابك
يالعـفـت امّـك وحيــده تنتظـر يم بابك
تدري من اشتـاگ يمّه اركض عله ثيابك
عـطـرك اشتمّه حبيبي اوگـع بمحـــرابك
بخدودي حفرت دمعتي نهر
اتـمـنّـه يبنـي تـتــرك السـفـر
........................
تدري يوسف من قميصه رد بصر يعگوبه
هم صدگ ترسل قميصك ونظر الاعجوبه
يمتـه يايـوسـف زمــانـي انتظـر چم نوبه
بيضّت عيـونـي ييُمّه من البچي محجوبه
عيوني بدمعها فگدت البصر
اتـمـنّـه يبنــي تـتـرك السـفـر
......................
والخـفـت منّه تحـقـق ياوسف بحسيني
هــذا ابـن حـذلم اجاني بالخـبـر ياذينـي
ذبحوا حسين آل اميّه ابچي دم ياعيني
ريت ميته ولا سمعتـه ولا تطول سنيني
ارجع وگولن ياضوه النظر
اتمنّـه يبنـي تـتـرك السفـر
سيد زيد الفحام
_،،،
617 views21:00