يتيمه اوحيده بمسافه بعيده وتعذب دليلي يدمعة حميده سمعت الحبيبه | الشاعر كرار حسين الكربلائي

يتيمه اوحيده بمسافه بعيده
وتعذب دليلي يدمعة حميده
سمعت الحبيبه
بغيابي غريبه
بمسافه بعيده
...
أنه بگبري وسمعت الخبر بالكوفه
اجت بنتي حميده بحبل مچتوفه
حبيبة گلبي ادري اعليه ملهوفه
الهوه شايل دمعها لگبري ويطوفه

گلبها عليه شكثر حَن إليه
املها بعمرها انتلاگه سويه
يعالم عجيبه
بغيابي غريبه
بمسافه بعيده
...
بظهر نوگ الهزل ونتها مسموعه
بالكوفه التقت يا ناس وي طوعه
مفجوعه تواسي بگلب مفجوعه
تناشدها بجفن ما ينشف دموعه

تگلها يجده صدگ عودي وحده
غريب بوطنكم ودمعته اعله خده
گلبها بنحيبه
بغيابي غريبه
بمسافه بعيده
...
تگلها والدچ ما باع نوماسه
طلع للجيش وحده وبالجدم داسه
عمت عيني وحيد وغدرته ناسه
وشفته من انگطع فوگ القصر راسه

يجده بغدرهم رموه من قصرهم
غداً يم محمد مينفع عذرهم

قرت هالمصيبه
بغيابي غريبه
بمسافه بعيده
..
جابتها اعله گبري بروح حزنانه
شفت زهرة حياتي هوايه ذبلانه
من درب السبي والضيم تعبانه
متت عطشان وانه بنيتي عطشانه

واجت يمها زينب عله مصابي تنحب
يبن عمي صاحت تره گلبي شيب
زلمنه خضيبه
بغيابي غريبه
بمسافه بعيده
...
عله العباس أسأل والگلب مجروح
گالو عفنه جسمه اعله النهر مطروح
وين حسين ابن عمي تصيح الروح
گالولي سليب بكربله ومذبوح

حميده تگلي گضو كلهم اهلي
سبوني يبويه وعله الناگه اصلي
مصايب رهيبه
بغيابي غريبه
بمسافه بعيده
...
مشت عني بعد ما سولفت آلام
بعد الكوفه عدها نايبات الشام
راحت وي رقيه بالخرابه تنام
جرح سبي الحرم لا يشفه لا يلتام

بعمرها زغيره وخذوها اسيره
التعيش بزماني عزيزه واميره
الگلب شب لهيبه
بغيابي غريبه
بمسافه بعيده
...
خادم الحسين ( عليه السلام)
كرار حسين الكربلائي
( ابو كميل )