من عشرة محرم ابچي من دم يا محرم لمقتل جدي اقره وآنه دموعي حمره | الشاعر كرار حسين الكربلائي

من عشرة محرم ابچي من دم يا محرم
لمقتل جدي اقره
وآنه دموعي حمره
الكون بعيني اظلم يا محرم يا محرم
...
لوبين اهلال الحزن يصعد للسمه نحيبي
اول محرم يا خلگ يرسملي نحر حبيبي
اكتب عهد مثل الخدم اخدم مجلسه بمغيبي
اذكر عليله بلا ابو وتنزل دمعتي اعله شيبي

يظل گلبي بعويله للعليله ليله ليله
فراگ الغالي جمره
وآنه دموعي حمره
الكون بعيني اظلم يا محرم يا محرم
...
رابع محرم انحني لأم الاربعه الحنينه
مثل الوفيه حسرتي تترس غربة المدينه
لمسلم اظل اقره نعي وقصة كوفته الحزينه
دمعة حميده دمعتي وگلبي الهايم بونينه

وانصاره الشهامه للكرامه اتظل علامه
موقفهم اذكره
وآنه دموعي حمره
الكون بعيني اظلم يا محرم يا محرم
...
بسابع محرم انلچم ليلة أبو فاضل هايه
بعيونه مكسور السهم وچفه انگطع يم الرايه
وبليلة القاسم احن اگضيها بچي واقرايه
اعلگ شمع واطفي شمع رمله وتظل تنعه اويايه

والأكبر مصابه يا عذابه ويا شبابه
كسره من يجبره
وآنه دموعي حمره
الكون بعيني اظلم يا محرم يا محرم
...
وبليلة العاشر سهر يِطوَل كل سنه اريده
محله الوداع بهالمسه آني أقره هالقصيده
عاشر محرم يا خلگ جدي ينگطع وريده
حافر يرض صدر الشرف والخنصر ينگطع من ايده

والاصعب عليه الهاشميه تظل سبيه
كل عماتي أسره
وآنه دموعي حمره
الكون بعيني اظلم يا محرم يا محرم
...
خادم الحسين ( عليه السلام)
كرار حسين الكربلائي
( ابو ريحانه)