أيُها الخادم هنيئاً دمعةِ العين اليحضر بمجلس مكانه بگلب الحسين | الشاعر كرار حسين الكربلائي

أيُها الخادم هنيئاً دمعةِ العين
اليحضر بمجلس مكانه بگلب الحسين
اِكتب بالجرح عايش منذبح والله احبك
...
هنيئاً يخادم
گِضه عمرك تعيش برحمة حسينك

چبيره نعمتك
تره مفتاح جنه الدمعه البعينك

تِوَجّهْ للحُسين وگِلّه مَولاي
الف شكراً جبتني لخدمتك هاي
اريد اكثر تِبَچّي اعليك عيناي
أنه دموعي قليله وحزنك هواي

ها يعاشگ عوف كل حچي اليلومون
والعقل خليه الهم عيش مجنون
اوفي بموعدك .. گل لسيدك والله احبك
...
العشگ مو سوالف
اليحب لازم يضحي لأجل محبوبه

ايتحمل معاناة
ويِطِش دموعه وعيونه عله دروبه

حچي الوادم يِتَعّب لا تسمعه
اليضحكك عوفه والبچاك اتبعه
ابو السجاد يعرف يا هي ربعه
اليخدمونه إسمهم اهل دمعه

إلتزم بحسين واترك كل حچي الناس
لا تخاف اهل اللطم بعيون عباس
صوتك ينسمع .. اِكتب بالدمع
والله احبك
...
دمعتك رساله
تطيح بچف ابو السجاد يوميه
تگله حبيبي
شحلاة الدنيه بالخدمه الحسينيه

اذا ناعي ذكر اسمك يغالي
اعيشن كربله بروحي وخيالي
تروح الناس بس انت اعله بالي
اعله مودك صفنتي وسهر الليالي

المفترض يگضي العمر دمعه وبچي ونوح
يا خلگ مو سهله هذا حسين مذبوح
دمعي لو همل .. يكتب مستهل والله احبك
...
هَويتك حسيني
هويتك هاي مو كلمن يحصلها
الزچيه توقع
ويجي العباس بالدفتر يسجلها

تره هالثوب الاسود يا موالين
يبيض صفحتك گدام الحسين
يعالم لو لِطمنه سنين وسنين
وحگ عباس ما نوفيله بالدين

اتِحذّر وبالك تِمِن ولروحك اتشوف
گبلك العباس منطي عيون وچفوف
والفطره أهم .. إِقسمله قسم والله احبك
...
حسيناه غريباه
تعال نصيح آيحسين ومصابه
وحيداه خضيباه
وانثر دمعتك يالعاشگ ابابه

يوادم عدنه خيمه وجروها
يوادم عدنه طفله سلبوها
يوادم عدنه محشومه سبوها
حده بيها الشمر من بعد اخوها

يا سلام الله عله الشيبه الخضيبه
يا سلام الله عله الضلت غريبه
واِعلن بالسمه .. يا بن فاطمه
والله احبك
...
خادم الحسين ( عليه السلام)
كرار حسين الكربلائي
( ابو كميل)