اهلاً وسهلاً يا شهر مذبوحي بيّن هلالك واني بيّن نوحي من البواچ | الشاعر كرار حسين الكربلائي

اهلاً وسهلاً يا شهر مذبوحي
بيّن هلالك واني بيّن نوحي
من البواچي كون تطلع روحي
يا محرم .. يا محرم
..
بيّن محرم .. يا دمعه تنضم
بعد بين بعيوني

ما عندي راحه .. اشبع مناحه
يا خلگ خلوني

يا مُحرم .. من تجيني يفز حنيني ودمعي بالعين
يا مُحرم .. اتضيع روحي والگه روحي بمجلس الحسين
يا مُحرّم .. ما نسيتك انت جرحي بكل السنين

فاگد عزيز وهاي اجتني ايامه
اتنام الخلگ والليل ابد مانامه
هلالك مثل جمره بگلب خدامه
يا محرم
...
بشهر المصيبه .. روحي غريبه
بس وطن روحي الگاه
دمعاتي طاحت .. وجروحي صاحت
يا ابا عبد الله

حسين جرحي .. مو شهر طول السنه ظل عايش وياي
حسين جرحي .. يا محرم وانت تلچم بالجرح جاي
حسين جرحي .. حسين روحي حسين گلبي حسين مولاي

لا تعتقدني يا محرم ناسي
اسم الحُسين اشتمه گبل انفاسي
اهلالك ضوه بس صار شيب براسي
يا محرم .. يا محرم
...
ابچي اعله موده .. وثيابي سوده
واحضر بتعزيته
دموعي هويتي .. لساعة منيتي
طير اعيش ابيته

ما نسيته .. انسه كل الناس بس هوه عله البال
ما نسيته .. حسين مو بلسان كون بدمعه ينگال
ما نسيته .. واليخدمه ايحسبه واحد من العيال

خدامه دللها وسليبه ثيابه
والزهره تگعد هالليالي ابابه
تقراله آيحسين آيمصابه
يا محرم .. يا محرم
...
البارحه أمي .. بس تبچي يمي
وگلت يمه شصاير
لزمتلي ايدي .. وگالت وليدي
ايهل محرم باچر

يبني يبني .. لا تقصر واخدم حسين بحياتك
يبني يبني .. بالمجالس التزم تضمن نجاتك
يبني يبني .. واذكر ابنياته من تشبگ بناتك

امي بست چفها وگلت يايُمه
بشيباتچ احلف ما اعوف الخدمه
عطرك يهب ومن البعد نشتمه
يا محرم .. يا محرم
...
انت المحنه .. بگلوب اهلنه
قدس الله ايامك
شهرك يمرنه .. يكسر ظهرنه
وننحني گدامك

يوم عاشر .. تفز حته الموته تصرخ واحسيناه
يوم عاشر .. الشمر گاعد فوك صدر حسين نلگاه
يوم عاشر .. يگول مت من العطش واحنه سمعناه

بهلالك انشوف الشمر حز راسه
تراوينه حافر خيلهم من داسه
اتذكرنه بخيامه وعطش عباسه
يا محرم .. يا محرم
...
خادم الحسين ( عليه السلام)
كرار حسين الكربلائي
( ابو كميل)