2023-04-29 13:30:45
#شور
بداية خلق الأرواح،،، أنكتب أسمي الخدمتك
يمولاي العمر راح،،، فدة الوحشة غربتك
نذرت أسنيني،، ومحاجرعيني،، قبل تكويني
ألك ياسيدي
وعيت وهايم،، لگيت الوادم،، تجل الخادم
وصرت من مولدي
عبد عندك وأخدمك
عطر رباني أشمك
شحلات الگعدة يمك00 بوسط ذاك الصحن
قريت أجمل عبارة
بمراسيم الزيارة
اليحب حر بقرارة 00 الگلب بيك أنفتن
يا لذة الحب الصدگ بيها أشعر وياك
دلالي ينبض بالعشگ لو جاسة طرواك
وبناأددم شما يحترگ بجنونة يهواك
حسين،،،،حسين
ألك مخلوقة الأكوان،،، وتسير بضل رحمتك
تروي وأنتة عطشان،،، حنين أبگد نعمتك
يساقي وضامي،، ملكت أحلامي،، شلي بأيامي
بسبيلك هالعمر
بعذابك روحي،، تواسي جروحي،، ألبواچي ونوحي
اعلة ذكرك تستمر
يحزني المالة چارة
الگلب لاهب حرارة
مشي بلا أستخارة00 أعلة دربك ما أزل
ألك كلشي أضحي
واذا يلچمني جرحي
لگيتك أنتة ربحي00 علي زيد الحمل
أسهر وأضحيلك عمر يا أغلى محبوب
يا أول وأخر سطر بعيوني مكتوب
ياذيني ياذاك الظهر البيه أنت مسلوب
حسين، ،،حسين
سماحة عشگي يحسين،،،يمرجع لليخدمك
الگلب ما يوسع أثنين،،،ونقشت بگلبي أسمك
سرة بشرياني،،وملك وجداني،،مصير أحزاني
مزجتة وي الضعن
الضعن وا أهاتة،،وأثر خطواتة،، تظل مئساتة
جرح طول الزمن
الضعن يشرح عذابة
فگد ذيچ المهابة
حدي الغربة وعتابة00 على النوگ الهزل
ضعن حرمة ويتامة
الرماح ألهن علامة
أحملن روس الشهامة00 واحس راسك عدل
راسك يسير وي الضعن فوگ اعلة الارماح
شفت الرمح شايل وطن لارض الغرب راح
هناك المشاعر يلتقن مابين الارواح
حسين، ،،،حسين
أنطلق مشوار الأحزان،،،بمسيرك أنت للطف
هدوئك چنة قرأن،،، لسانك كلة مصحف
حنينك عابر،، حدود العاشر،، وطن ومسافر
الى طف العشگ
خيامك رحمة،،ڤياي ونعمة،، پأيادي الغشمة
وسافة تحترگ
يمولاي الگلب هام
جمرتة من الخيام
رماد اخيامك شضام00 أثر دوسة طفل
أثر بي للنساوين
أنطفة برجل الميامين
جمر ذيچ الصواوين00 لچن ظل مشتعل
انطلقت حرارة بكل گلب مستعرة لليوم
والعين مو دمعة تصب جمرات وهموم
وحشة وكلف ليل الغرب بي كلشي معدوم
حسين،،،، حسين
طفت كل القناديل،،، وگمر ضاوي كمالك
درب أحزانك أطويل،،، اليحب يرغب وصالك
وصالك نسمة،،وضياعك لچمة،،قبول الخدمة
أذا أنت أقبلت
وگفت أبابك،، طحت بعتابك،،ابوس أترابك
مدد منك ردت
ترابك بيه مشاعر
هواجس للخواطر
عطر دم المناحر00 اليشم بي ينتعش
هواك ينقي ريتي
بعد صفيلي نيتي
يظل أسمك هويتي00 وحروفك تنقش
نفحة ترابك بيها أشم عطر السماوات
دم تضحياتك بي رسم ستر الحجابات
الماشافك بيقضة وحلم شافك حضارات
حسين، ،،،،حسين
حسين حمدان الدلفي
582 views10:30