الشاعر حسين المحامي

2023-03-10 17:47:31 من تزيد ذنوبك وتثكَل عليك
وتخشى يوم الاخرة حسابك يطول
صلي عالهادي النبي وكلها تطيح
بشرط تذكر بالصلاة ال الرسول
حسين المحامي Aprire / Come

2023-03-10 17:46:38 # هوسات لميلاد الامام المهدي عج

بميلادك يمهدي الدنيه شعت خير
مو بس البشر بيه فرح حته الطير
بعد فرحة طلعتك ننتظرها تصير
حته الدنيه تعٌيد ويانه

ليلة مولدك للامة اجمل عيد
يمن ساكن كلبنه ومانكول بعيد
عدنه امنيه بجيتك غيرها شنريد
بس شوفت عينك تكفينه

هل نورك علينه وانشتر خيرك
يمن ما النه بالدنيا امل غيرك
عطشنه نريد نروي سيدي ابيرك
وتطيب اجروح التاذينه

فرحه بمولدك بس فرحه من فرحه
بحيث الكلب ظل يخيط بجرحه
نعم واقعنه مر بس جيتك تصلحه
والخير يعم بدنيانه

بميلاد ابو صالح روحي مبتشره
شعلت شموع روحي وكلبي والعشره
عجل بالفرج يافرحة الزهره
عجل وامسح جرح البينه

حسين المحامي Aprire / Come

2023-03-03 15:10:15 #مولد علي الاكبر ع

شعت علينه انواره.....الاكبر مولده
للدنيا احلى ابشاره.....الاكبر مولده
مبارك للحسين
بيه قرت العين
====================
مولد علي الاكبر اجه بخير وسلامه
والفرحة صارت بالسمه اجمل علامه
بعيون ابو السجاد مرسومه ابتسامه
نزلت ملائكة السمه تهني بعمامه

بيه فرحت المعموره..الاكبر مولده
والشمس تحجي بنوره..الاكبر مولده
ابن الميامين
بيه قرت العين
=====================
شع نوره بالدنيه الحبيب الطيبه ذاته
يشبه الهادي المصطفى ويشبه صفاته
ابخلقه واخلاقه النبي ووجهه شحلاته
بوجدان الحسين الله يدري شكد غلاته

بوصافه مثل الهادي..الاكبر مولده
صار الحسين ينادي..الاكبر مولده
بيه يفرح الدين
بيه قرت العين
======================
يوم اهدعش من شهر شعبان المبارك
بهجه وفرح خير وامل بيه نتشارك
مولد الاكبر فرحه وابسمه نتبارك
ونصيح يامهدي بعدنه بانتظارك

تهتف كلوب احبابه..الاكبر مولده
كل كلب فاتح بابه..الاكبر مولده
بحبكم مجانين
بيه قرت العين
======================
مثل الشمس نوره بزغ والدنيا تشهد
ناس التشوفه بمشيته كالو محمد (ص)
محد ملك هاي الصفه وما مثله احد
حته الورد لو شم عبيره بعطره ورّد

جن وانس مسروره...الاكبر مولده
هالليله شعشع نوره...الاكبر مولده
بدربه احنه ماشين
بيه قرت العين
======================
يوم المبارك مولده تصيح الضماير
وكلوب الاحباب انملت فرحة ومشاعر
اسمه اعله شفة كل محب واعله المنابر
بكل دور الاحباب الفرح هالليله حاضر

فرحة اكلوب السادة...الاكبر مولده
حسين السبط واولاده..الاكبر مولده
لكل الموالين
بيه قرت العين
======================
نهني الزجية فاطمه ونهني الاقمار
نبارك الليله بمولد الاكبر للاطهار
وندعي الهي وياهم تسجلنه انصار
هم الامل وكت الشدد وبكل الاخطار

وندعي لفرج مهدينه...الاكبر مولده
نرفع الليله ايدينه......الاكبر مولده
وعالخدمة باقين
بيه قرت العين
============حسين المحامي Aprire / Come

2023-02-16 12:37:33 كربلاء الليله تنعى الكاظمية
كربلاء. ناحت ونصبت عزيه
كربلاء. تبجي من عظم الرزيه. كربلاء
================
لبست السواد.علنت الحداد.لكعبة المراد.ناحت بحزنها
بشوغت الخيام..تبجي للامام..بجت الحمام.وانكشف المها

كل ذرة بيها تواسي وتنوح
مجروحه لكن زادت جروح
حزانه كلها وضلت تنوح. ياغريب

بالونين..بدمع حار والم منحر
بالونين.ناحت لموسى ابن جعفر
بالونين.والجزع صارلها منظر. كربلاء
=====================
كل شبر يصيح..بنبره الذبيح.كلشي بالضريح.. ينحب لحبيبه
الكافل وحبيب.ناحو الغريب..بحسره وبنحيب ..عاشو المصية

صار العزاء ابطف الحسين
كل الانصار محومره العين
زينب التقره اوي النساوين. ياغريب

كلشي ذاب..والصخر خانكته عبره
كلشي ذاب..للسجين المحني ظهره
كلشي ذاب..هناك رفعو رايه حمره. كربلاء
====================
العلكمي الحزين.يجري بس ونين.لسيده السجين.والجرف مناحه
يندب الفرات..بروحي كلشي مات..ماردت حيات ..وبمماتي راحه

صاح المخيم بيه لوعات
منهن بجت حته السموات
سمعتني من ابجي المنارات. يا غريب

بالحديد..ابجي للذبحو ركبته
بالحديد. هذا منظر كبل شفته
بالحديد..والفرق ماشافته اخته. كربلاء
==========================
عالجسر وحيد..والاهل بعيد.امجرحه الحديد..حته لونه مصفر
غطته الجروح.والالم يلوح.سجنه ظل ينوح. .والجسر تفطر

مفطور جبده وجفه مشدود
فاطمه تعنت لابسه السود
صاحت ييمه بكلب ممرود. ياغريب

يالحبيب..ياهو ذبل هيج لونك
يالحبيب.شمس ماشافت عيونك
يالحبيب.هلك ماكو ايشيعونك. كربلاء
======================
موطن النحور.كصدتك تزور..وبدمع يفور.سجدت اعله بابك
البكلبها اه..للولي وضماه..القبله و الصلاه....ناحت لشبابك

تلوج اعله بابك لوج محتار
تدعي الله كون يعجل الثار
للكلبه هسه اموجر بنار. ياغريب

تعتنيك...كربله واخضر جرحها
تعتنيك...تصب بعتابك دمعها
تعتينك...الليله متغير وضعها. كربلاء

=======================حسين المحامي Aprire / Come

2022-12-11 08:02:34 الجم كلبي كل ما اهل التراب
يسبكَني الدمع من اوصل الباب

جن روحي ادفنتها يمج ودعتها
ياام الحسن
========================
شلون بروحي من دونج اذا ما اشوفن عيونج حبيبه
انه الاجبر الخاطر حالي شجم كلب كاسر غريبه
شحال اليدفن بروحه تظل ابلا دوه جروحه مصيبه
درت بس وجهي مو كلبي واحس شما بعد دربي قريبه

اهل بترابج وترجف هالجفوف
انه الحته اسمي مخوف الخوف
ودموعي الهلتها يمج ودعتها
ياام الحسن
=====================
حرت من ارجع لداري شكلهم والدمع جاري اليتامه
حسن وحسين لاكوني شافو حسره بعيوني علامه
زينب اجت مرعوبه ابوها امترب وثوبه شعلامه
كالو بويه وين امنه نحس من هيه مو يمنه قيامه
ينشدوني واحير انه اشكلهم
شجاوبهم اذا دافنهه امهم
جم حيره العشتها يمج ودعتها
يام الحسن
=====================
بعدج ماشفت راحه طير وكسرو جناحه واعاني
كبل ما طيح ادموعي عكَبج كسر اضلوعي زماني
رجعت لغرفة احزانج انوحن صرت ومجانج مجاني
ضاكت دنيتي بعيني يمته يخلصن اسنيني اتاني

بعدج مابقت راحه ويه دنياي
فزن كل جروحي وصارن هواي

راحة الماشفتها يمج ودعتها
ياام الحسن
======================
حسرة سطرة خدودج بيوم الوصلو حدودج جبيره
بابج لمن احتركت صفنت ريتي واختنكت حسيره
يزهرة وكلبي ماردته بغيابج عمري ماخذته ياميره
انتي الراحة البالي لحالج ذاب دلالي وضميره

حسيت العمر ما بيه طعم صار
اساهر ليلي جن بكلبي بسمار

دنيه وما ردتها يمج ودعتها
يام الحسن
======================
وحيد وداري جن ظلمه يا اطيب واجل نعمه نعمتي
عكبج كثرن الامي دفنت ابلحدج احلامي وضحكتي
ظلت روحي مفجوعه يحس الشافها بلوعه دمعتي
من اكبالي دفعوها وعليج الباب حركوها حسرتي

تصب اعيوني لو جابولي طرواج
تمنيت ابضلوعي انكسرن وياج

الاه الكلتها يمج ودعتها
يام الحسن
==================حسين المحامي Aprire / Come

2022-12-10 12:02:12 علي امن اسمك ضمايرنه ملينه
نحبك واي عشك غيرك ملينه
اذا لحظه احنه من حبك ملينه
نضم ارواحنه بحدر الوطيه Aprire / Come

2022-11-28 00:18:25 بثواب الطاهرة الطبية ام الحسين
صلو اعله النبي شكد ما تكدرون
اللهم صل على محمد وال محمد عدد خلقك وزنة عرشك ومداد كلماتك Aprire / Come

2022-10-24 19:32:43 متغرب وتعبان وانفاسك جروح
والطف عشيرة نوح ومخيمه بالروح
#يا مولاي يا ابا صالح Aprire / Come

2022-10-14 12:36:42 يكلبي افرح ابهل ليله وابشراك
الحزن كيده بحبل شوكَك وبشراك
الخلك كبل النبي بظلمه وبشراك
نزل هاليوم خير اعله البريه

حسين المحامي Aprire / Come

2022-10-11 19:46:33 الي جمره بدليلي ماي وجها
غير حسين كَلبي مايوجها
الخدم غيره ايتبده ماي وجها
وابو الاكبر يصعدك للثريه

حسين المحامي Aprire / Come