ليلة عرس ولزفتك شمعاتك بإيدي ليلة عرس ليش الدمع بعيوني يوليد | الشاعر كرار حسين الكربلائي

ليلة عرس
ولزفتك شمعاتك بإيدي
ليلة عرس
ليش الدمع بعيوني يوليدي
زفة شباب .. ترسم عذاب
بعيوني يوليدي
...
حلم كل ام بعمرها تفرح بزفة ولدها
وتحضر بعرسه عمامه واعله راسه اتطش وردها
ليش بس امك ييمه بعرسك الدمعه اعله خدها
بلا فرح هالليله روحي وحسبه تاخذها وتردها

يمه الولد
حلم العمر بوداعك تذبحه
يمه الولد
بدموعي ليش اتبدل الفرحه
كلمة عتاب .. ترسم عذاب
بعيوني يوليدي
...
ما جنت احسب ليالي لزفتك احسب ثواني
من بعد تعبي التعبته لكلمة عالخير اتاني
حته بحلامي جبتلك حنه وشموع وصواني
عرسك امنيتي بحياتي الطف ييمه منين اجاني

ضاع الامل
ما ظل امل يبني بگلب امك
ضاع الامل
واتبدت سنين التعب يمك
سنين السراب .. ترسم عذاب
بعيوني يوليدي
...
وجهك شمحله جماله مثل وجه الحسن چنك
اوگف اگبالي اعله طولك خلني اشبع شوف منك
انت اقرب من خيالي وخايفه يبعدوني عنك
ادري ما مقسوم اليه گلبي حس من زغر سنك

بليل السهر
حته النجم يغفه والوليلك
بليل السهر
حد الفجر يوليدي ادعيلك
دموع المصاب .. ترسم عذاب
يوليدي بعيوني
...
الموت بسنينك رساله وشايل بچفك وصيه
السالفه وما بيها انت من الحسن لحسين اخيه
والدك رادك ييمه اتمثله بالغاضريه
حسين محتاجك واودعك حته لو غالي عليه

حان الوفه
يا بوالوفه لهاليوم ربيتك
حان الوفه
وگبل العرس بحسين وصيتك

حروف الجواب .. ترسم عذاب
بعيوني يوليدي
...
وليدي يا جاسم اريدك تكشخ بثوب الشهاده
الضحه لجل حسين يبني ينمنح تاج السياده
هالعرس ما منكتبلك ما يتم بارينه راده
زفتك للجنه احله الاخره هيه السعاده

يبن الحسن
تلگه الحسن بالجنه منتظرك
يبن الحسن
ويخاطبك وفيت الي بنذرك
وبإنتخاب .. ترسم عذاب
...
باچر يطفون شمعه وتطفه كل ايامي يمك
آه يا ريحة الغالي يصيح لو رد بيك عمك
بمعصبي جرحك اشده وشيبتي يحنيها دمك
مغمض عيونك يجاسم حگها تعمه عيون امك

من تنذبح
ساعة زمن هم ينذبح عمك
من تنذبح
تمشي تره بدرب السبي امك
حنتك خضاب .. ترسم عذاب
بعيوني يوليدي
خادم الحسين ( عليه السلام)
كرار حسين الكربلائي
( ابو كميل)